* ७६ लाखांहून अधिक शेतकऱ्यांच्या सातबारावर ई-पीक नोंदणी पूर्ण*

* ७६  लाखांहून अधिक शेतकऱ्यांच्या सातबारावर ई-पीक नोंदणी पूर्ण*

*ई-पीक पाहणी प्रकल्पाला शेतकऱ्यांची पसंती*

-- महसूल मंत्री बाळासाहेब थोरात

मुंबई, दि. ७: महसूल विभागाने शेतकऱ्यांना सक्षम करण्यासाठी सुरु करण्यात आलेला ई-पीक पाहणी हा प्रकल्प शेतकरी यांचेसाठी वरदान ठरणार आहे. ई पीक पाहणी प्रकल्प शेतकऱ्यांचे पसंतीला उतरत  असल्याचे महसूल मंत्री बाळासाहेब थोरात यांनी सांगितले. खरीप हंगामात ७६ लाख शेकरी खातेदार यांनी केली नोंदणी. 

                      श्री. थोरात म्हणाले की, शेतकऱ्यांच्या सातबारावर पीक पाहणीची अचूक नोंद होण्यासाठी  राज्य शासनाने ' माझी शेती माझा सातबारा, मीच नोंदविणार माझा पीक पेरा' ही मोहीम हाती घेतली आहे. ई-पीक पाहणी मोबाईल ॲप प्रकल्पास राज्यभरातील शेतकरी वर्गातून चांगला प्रतिसाद मिळत आहे. आजपर्यंत ७६ लाखांहून अधिक शेतकऱ्यांनी हे ॲप डाऊनलोड केले असून या शेतकऱ्यांनी ई-पीक पाहणी देखील नोंदविली आहे. महाराष्ट्रात राबविण्यात येणारा हा व्यापक प्रकल्प असून हा प्रकल्प राज्यातील प्रत्येक कुटुंबाशी जोडला जाणारा आहे. या प्रकल्पामुळे शेतकरी बांधवांना आपल्या पीकाची माहिती स्वत:च भरणे शक्य होणार आहे. आताच्या डिजिटल युगात शेतकऱ्यांना सहज, पारदर्शक व बिनचूक पध्दतीने आपल्या पिकांची नोंदणी करता येणार आहे.

                            जमीन महसूल कायद्यानुसार शेतजमिनीच्या उताऱ्यांवर पिकांची नोंद करण्याची पध्दत आहे. यामुळे शेतकऱ्यांचे उत्पादन, शेत जमिनीची प्रतवारी, अतिवृष्टी किंवा दुष्काळ यामुळे झालेल्या नुकसानीचा अंदाज लावणे शक्य होते. शिवाय या पीक नोंदणीच्या आधारे शेतकऱ्यांना  पीक कर्ज मिळणे देखील सुलभ होणार आहे  तंत्रज्ञानामुळे शेतकऱ्यांच्या आयुष्यात मोठा बदल केला आहे. आता ई-पीक पाहणी मोबाईल ॲपमुळे शेतकऱ्यांना स्वत:च आपण पिकवित असलेल्या पिकांची माहिती ॲपमध्ये भरणे सोपे होते. ई-पीक पाहणी प्रकल्पामुळे गाव, तालुका आणि जिल्हानिहाय प्रत्येक पिकाचे क्षेत्र समजण्यास मदत होणार असल्याचे महसूलमंत्री म्हणाले.

                          ई-पीक पाहणी मोबाईल ॲप मधील काही तांत्रिक अडचणी दूर करण्यात आल्या असून सर्व शेतकऱ्यांसाठी अपडेटेड व्हर्जन प्ले स्टोअर वर उपलब्ध करून दिले आहे ई पीक पाहणी (व्हर्जन १.०.०.४) सर्व शेतकरी यांनी डाऊनलोड करून वापरावे म्हणजे अडचणी येणार नाहीत . आपण या पूर्वीचे ई-पीक पाहणी मोबाईल ॲप वापरात असाल तर त्यावरील अपडेट बटन दाबून ॲप अपडेट करून घ्या . 

रामदास जगताप 

राज्य समन्वयक , ई पीक पाहणी प्रकल्प